Stefnir í eitt versta árið í Soginu

Veiðin í Soginu er búin að vera afleit í sumar og veiðimenn vona að hinar árlegu haustgöngur skili einhverju í bækurnar til að laga veiðitölurnar aðeins.

Síðustu fréttir sem við höfum af veiðitölum eru 6 laxar úr Alviðru, 32 laxar úr Bíldsfelli, 20 laxa úr Syðri Brú og líklega um 40 laxa úr Ásgarði en við höfum þá tölu þó ekki staðfesta.  Sogið er sem sagt líklega ekki komið yfir 100 laxa og því miður stefnir í að áin verði með lélegri veiðien árið 2000 sem þó var eitt það versta í ánni en þá komu 249 laxar á land.  Það sem hefur þó bjargað nokkrum veiðitúrunum þarna í sumar eru góð skot í bleikjunni en algengt er að sjá 3-5 punda bleikjur í ánni.  Það þarf þó að þekkja Sogið sæmilega vel til að veiða mikið af henni en flestir sem fara þarna setja þó einhvern tímann í stóra sogsbleikju og er það oft ekkert síðra en að eiga við laxinn.