Pirelli hefur ekkert á móti fleiri keppnum

Ítalski dekkjaframleiðandinn Pirelli sem sér Formúlu 1 liðum fyrir dekkjum segist ekki hafa neitt á móti lengra tímabili með fleiri keppnum.

Yfirstandandi tímabil telur 19 keppnir. Áform eru uppi um að þær verði 20 árið 2015 þegar Mexíkó bætist við dagatalið.

Árið 2016 verða keppnirnar hugsanlega yfir 20, Azerbaijan bætist þá við og einnig er hugsanlegt að keppni verði haldin í New Jersey í Bandaríkjunum.

Formúlu 1 liðin hafa vissar áhyggjur af auknum útgjöldum vegna meiri ferðalaga og meiri aksturs. Paul Hembrey, yfirmaður kappakstursdeildar Pirelli gefur lítið fyrir þær áhyggjur.

„Þetta er bara rökrétt. Því fleiri sem keppnirnar verða fá liðin meiri pening í kassan að lokum, einfaldlega vegna þess að þau verða þá sýnilegri. Við höfum því ekkert á móti fleiri keppnum, það myndi þó gera fólki erfitt fyrir að lifa eðlilegu lífi svo það gæti þurft að tvímenna sumar stöður innan liðanna, en þá má læra að lifa með því,“ sagði Hembrey.

Hann vill sjá nýjar keppnir staðsettar þar sem aðdáendur eru viljugir til að mæta. Hann segir mikilvægt að aðdáendur þurfi ekki að ferðast mjög langt til að komast á brautirnar. Miðbæjarkeppnir og aðrar götukappastursútfærslur eru að hans mati besta leiðin til að fá fólk til að koma og horfa á.

Orðrómur hefur verið á kreiki lengi um kappakstur á götum Lundúna, slík keppni yrði líklega gríðarlega vinsæl enda mikill Formúluáhugi í Bretlandi.