Suarez spilar með Barcelona í dag

Luis Suarez er enn í banni hjá Alþjóða knattspyrnusambandinu, FIFA, en mun í dag klæðast treyju Barcelona í annað skipti.

Samkvæmt spænskum fjölmiðlum mun hann taka þátt í vináttuleik varaliðs Barcelona gegn U-19 ára liði Indónesíu klukkan 14.00 í dag.

Hann kom við sögu í leik á undirbúningstímabilinu í síðasta mánuði en hann verður í banni til 25. október næstkomandi fyrir að bíta Giorgio Chiellini, leikmann Ítalíu, á HM í sumar.

Upphaflega var honum meinuð öll afskipti af knattspyrnu en dómurinn var mildaður eftir áfrýjun. Honum er nú heimilt að æfa með Barcelona, sem hann samdi við í sumar, og taka þátt í óopinberum leikjum.