Heilræði til RÚV

Ríkisútvarpið (RÚV) er í slíkum fjárhagskröggum að það hefur neyðst til að leita á náðir kröfuhafa sinna og semja um frestun til áramóta á afborgun af skuldabréfi, sem var á gjalddaga í síðustu viku. Svo sem við var að búast setti Kauphöllin skuldabréf RÚV á athugunarlista við þessi tíðindi enda geta þau bent til þess að RÚV sé ógjaldfært fyrirtæki sem stefnir í gjaldþrot.

RÚV hefur búið við stöðugar tekjur um langt skeið og tekjur fremur farið vaxandi. Frá skattgreiðendum fær RÚV rösklega þrjá milljarða á hverju ári. Auglýsingar, kostun og fleira skila svo um 2,2 milljörðum á ári þannig að á síðasta ári hafði RÚV úr meira en 5,3 milljörðum að spila. Frá rekstrarárinu sem lauk í ágúst 2011 höfðu tekjur RÚV aukist um meira en 7,5 prósent og samkvæmt hálfsárs uppgjöri frá því í febrúar á þessu ári standa tekjurnar því sem næst í stað á milli ára. Auglýsinga- og kostunartekjur dragast lítið eitt saman en framlag skattgreiðenda hækkar.

Stjórnendur RÚV hafa haft mörg ár til að laga rekstur fyrirtækisins að þeim tekjuramma sem því er settur. Ekkert hefur gerst í sumar sem kollvarpar fjárhagsstöðu fyrirtækisins og skýrir ógjaldfærni.

RÚV rekur í dag tvær útvarpsstöðvar og eina sjónvarpsstöð. Hjá fyrirtækinu hafa verið um 300 stöðugildi undanfarin ár en eitthvað hefur þeim fækkað á þessu ári. Þegar starfsmannafjöldinn er borinn saman við t.d. fjölda starfsmanna 365 miðla, sem rekur fjölda útvarpsstöðva og sjónvarpsstöðva, fyrir utan að gefa út víðlesnasta dagblað landsins og dreifa því til lesenda þá eru hjá 365 álíka mörg stöðugildi og hjá RÚV þrátt fyrir mun umfangsmeiri starfsemi.

Það virðist vera RÚV um megn að keppa við einkaaðila á fjölmiðlamarkaði þrátt fyrir ríflega þriggja milljarða forgjöf frá skattgreiðendum og væna sneið af auglýsingamarkaðinum. Það ætti að vera hægt að reka eina útvarpsstöð og eina sjónvarpsstöð fyrir 2-2,5 milljarða á ári ef menn gæta hófs í yfirbyggingu og stilla sig um að yfirbjóða aðra fjölmiðla í kaupum á erlendu afþreyingarefni og útsendingarrétti frá íþróttaviðburðum. RÚV ætti að geta sinnt menningar- og öryggishlutverki sínu vel innan þess ramma sem framlög skattgreiðenda setja fyrirtækinu.

Ekkert þarf að standa í vegi fyrir því að RÚV kosti rekstur sinn eingöngu með ríflega þriggja milljarða fjárframlagi skattgreiðenda, hverfi af auglýsingamarkaði og greiði af skuldabréfum sínum á réttum tíma.

Skjóðan er frekju- og leiðindaskjóða, sem lætur ekkert mannlegt sér óviðkomandi. Skjóðan skrifar í Markaðinn í Fréttablaðinu á miðvikudögum.