Búið að selja yfir 10 þúsund miða á bardaga Gunnars í Globen

Það fer hver að verða síðastur í Svíþjóð að næla sér í miða á bardaga Gunnars Nelson og Rick Story í Globen-höllinni glæsilegu.

Garry Cook, yfirmaður UFC í Evrópu, staðfesti við Vísi í morgun að búið væri að selja yfir 10 þúsund miða og því stutt í að verði uppselt. Líklega verða seldir rúmlega 12 þúsund miðar á bardagakvöldið.

Cook sagðist vera ánægður með áhuga Svía á viðburðinum þó svo þeirra aðalstjarna í íþróttinni, Alexander Gustafsson, sé ekki að keppa.

Cook vonast einnig eftir fínni mætingu á vigtunina sem verður haldin í Globen á morgun.