Myndavélin á hjálmi Schumacher gerði mestan skaða

Nýjustu fréttirnar af formúlugoðsögninni Michael Schumacher eru þær að hinn 45 ára gamli Þjóðverji sé enn að vakna úr dáinu því að það ferli er allt mjög hægt. Þetta er haft eftir fimmtán ára syni hans Mick. Það er einnig komið í ljós að það var myndavélin á hjálmi hans sem orsakaði mesta skaðann.

Michael Schumacher er nú í umsjón fimmtán sérfræðinga á heimili sínu við Genfar-vatn þar sem hann hefur verið undanfarna tvo mánuði á meðan unnið er í því að fá hann til fullrar meðvitunnar.

Schumacher fékk mjög slæmt höfuðhögg eftir fall á skíðum í frönsku Ölpunum milli jóla og nýárs. Schumacher var í dái í 189 daga eða frá 29. desember 2013 til 16. júní 2014 en fór af spítalanum 9. september síðastliðinn.

Mick er fimmtán ára sonur Michael Schumacher sem var með honum þegar slysið varð. Jean-Louis Monclova hitti hann og fékk innsýn í gang mála og tjáði sig síðan í útvarpsviðtali í gær. „Þrátt fyrir að hlutirnir gangi hægt þá hefur hann nægan tíma. Hann hefur allt lífið sitt til að koma til baka," sagði Monclova.

„Aðalvandamálið hjá Michael var ekki að hann skall á steininum heldur gerði myndavélin á hjálmi hans mesta skaðann. Það er hún sem orsakaði heilaskaðann," sagði Monclova.