Vettel sleppir væntanlega tímatökunni í Texas

Sebastian Vettel, fjórfaldur og ríkjandi heimsmeistari í Formúlu 1 segir að líklega muni hann sleppa tímatökunni. Tilgangurinn er að spara nýja vél sem sett verður í bílinn.

Reglurnar kveða á um að nota megi fimm eintök af hverjum hluta vélarinnar. Eftir að sjötta eintakið af einhverjum hlutanna er notað þá er ökumaður færður aftur um 10 sæti á ráslínu.

Red Bull íhugar að taka einn skell og skipta um allt í vél Vettel. Ef af því verður þá mun Vettel þurfa að hefja keppni frá þjónustusvæðinu á sunnudaginn. Þá er engin sérstök ástæða til að taka þátt í tímatökunni og best að spara nýju vélasamstæðuna.

„Ég held að þetta verði staðfest, en já, við verðum að setja aðra vél í á árinu og það verður mjög liklega hér. Augljóslega gekk okkur illa hvað varðar áreiðanleika á fyrri hluta tímabils, það gerðist margt sem hefur leitt okkur í þessa stöðu. Við munum aka á æfingunum til að nýta brautartímann, en við munum einblína á keppnina því gott gengi í tímatöku skiptir engu ef við þurfum hvort eð er að ræsa frá þjónusutsvæðinu,“ sagði Vettel.

„Það má ræða um skylduna til að taka þátt en þegar allt kemur til alls þá verðum við að skipuleggja okkur í þessum aðstæðum með vélarnar. Reglurnar eru eins fyrir alla, auðvitað var það okkur að kenna að vera gráðug í byrun tímabils, ég glímdi við ýmis vandamál tengd áreiðanleika og það fóru margar vélar í súginn,“ bætti Vettel við.

Það verða því væntanlega aðeins 17 bílar sem taka þátt í tímatökunni á laugardag. FIA (alþjóða akstursíþróttasambandið) gæti gripið inn í en ef ekki mun einungis einn bíll detta út í fyrstu lotu á laugardaginn. Enda eru Marussia og Caterham ekki þáttakendur í bandaríska kappakstrinum í ár.