Bræður vilja bjarga Marussia

Bresk-indverskir bræður, Baljinder Sohi og Sonny Kaushal eru nú í samningaviðræðum við forsvarsmenn Marussia. Þeim virðist vera full alvara í að reyna að bjarga liðinu.

Marussia varð á dögunum annað liðið á einni viku til að lýsa yfir gjaldþroti. Liðið mun ásamt Caterham liðinu missa af bandaríska kappakstrinum.

Bræðurnir, hafa unnið fyrir sér í stáliðnaðinum. Þeir eru nálægt því að landa samningi samkvæmt Sohi. Samningurinn er talinn hljóða upp á 55 milljónir punda, eða 10,7 milljarða króna.

„Við erum nálægt því að ná samningi. En verðið verður að vera rétt. Við höfum lagt fram alvöru tilboð og við bíðum nú og sjáum hvað gerist,“ sagði Sohi.

Samningaviðræður standa yfir. Núverandi eigandi Andrei Cheglakov er sagður vilja fá 65 milljónir punda (12,7 milljarða króna) fyrir liðið. Inn í því yrði uppgjör á skuldum sem eru 30 milljónir punda (5,9 milljarðar króna).

Samkvæmt ýmsum heimildum er bræðrunum full alvara að tryggja að liðið keppi á næsta tímabili. Marussia er sem stednur í níunda sæti í keppni bílasmiða. Fyrir það fást 40 milljónir punda í verðlaunafé eða 7,8 milljarðar króna.