Mikil spenna fyrir lokahringinn í Tyrklandi

Ástralski kylfingurinn Wade Ormsby leiðir fyrir lokahringinn á Turkish Airlines Open sem fram fer í Antalya í Tyrklandi en eftir fyrstu þrjá hringina er hann á 12 höggum undir pari.

Ian Poulter leiddi fyrir þriðja hring en hann lék alls ekki vel á Montgomerie Maxx Royal vellinum í dag og kom inn á 74 höggum eða þremur yfir pari. Hann er þó enn meðal efstu manna og deilir öðru sætinu með Lee Westwood og Marcel Siem á 11 höggum undir pari.

Miguel Angel Jimenez sem leiddi eftir fyrsta hring situr einn í sjöunda sæti á níu höggum undir pari en hann þarf að eiga frábæran lokahring ef hann ætlar að bæta met sitt enn frekar sem elsti kylfingur sem sigrað hefur í móti á Evrópumótaröðinni.

Þá vekur athygli að John Daly er í toppbaráttunni en Daly fékk boð frá styrktaraðilum mótsins um að taka þátt um helgina. Hann er á átta höggum undir pari en þessi litríki kylfingur hefur átt misjöfnu gengi að fagna að undanförnu og gaman er að sjá hann ofarlega á skortöflunni á ný.

Lokahringurinn verður í beinni útsendingu á Golfstöðinni í fyrramálið frá 08:30.