Tveir leiða fyrir lokahringinn í Dubai

Svíinn Henrik Stenson og Spánverjinn Rafa Cabrera-Bello elska greinilega að spila í Dubai en fyrir lokahringinn deila þeir forystunni á DP World Tour Championship sem fram fer á Jumeirah vellinum.

Þeir eru báðir á 14 höggum undir pari en Henrik Stenson sigraði á þessu móti á síðasta ári á meðan að Cabrera-Bello sigraði á Dubai Desert Classic árið 2012.

Í þriðja sæti er Justin Rose á 11 höggum undir pari en þeir Victor Dubuission, Tyrell Hatton, Thornbjorn Olesen og Rory McIlroy deila fjórða sætinu á tíu höggum undir pari.

McIlroy komst á tíma í forystu á þriðja hring eftir fjóra fugla á fyrstu tíu holunum en hann missti einbeitinguna á 12. holu eftir slæmt upphafshögg. Hann fékk tvo tvöfalda skolla í röð og hrundi niður skortöfluna en með góðum hring á morgun gæti hann gert atlögu að forystusauðunum.

Lokahringurinn verður eflaust mjög spennandi en hann verður sýndur í beinni útsendingu á Golfstöðinni frá klukkan 08:00 í fyrramálið.