Alfreð lék síðstu 13 mínúturnar í stórtapi Real Socieadad

Villarreal varð í kvöld fyrsta liðið til að leggja Real Sociedad að velli frá því að David Moyes tók við liðinu. Villarreal vann leik liðanna 4-0 á heimavelli í spænsku úrvalsdeildinni í fótbolta.

Villarreal var mun betri aðilinn í leiknum og sótti án afláts frá byrjun. Markið lét þó bíða eftir sér og þegar það loksins kom var það í dýrari kantinum.

Á 63. mínútu skaut Bruno úr aukaspyrnu af rúmlega 20 metra færi í slána, jörðina og bakið á Enaut Zubikarai markverði Real Sociedad og inn. Fyrsta markið sem Sociedad fær á sig undir stjórn David Moyes og mörkunum átti eftir að fjölga hratt.

Tíu mínútum síðar bætti Denis Cheryshev glæsilegu marki við en Alfreð Finnbogason fékk loksins tækifæri þegar þrettán mínútur voru til leiksloka og úrslitin svo gott sem ráðin.

Innkoma Alfreðs hafði lítil áhrif því yfirburðir Villarreal voru miklir og gerði Moi Gomez endanlega út um leikinn með tveimur mörkum á síðustu tíu mínútum leiksins.

Villarreal er með 24 stig í efri hluta deildarinnar en Real Sociedad er með 13 stig, þremur stigum frá fallsæti.