Chris Como er nýr sveifluþjálfari Tiger Woods

Það segir sig sjálft að nýi sveifluþjálfari Tiger Woods verður töluvert í sviðsljósinu á komandi mánuðum en fyrir stuttu tilkynnti Woods að hann hefði ráðið Texasbúann Chris Como til þess að aðstoða sig.

Como hefur ekki unnið með mörgum stórstjörnum í golfheiminum áður og hefur töluvert öðruvísi ferilskrá heldur en fyrrum þjálfarar Woods, sem margir hverjir hafa verið stór og þekkt nöfn. Como er hins vegar sagður feiminn og hlédrægur kennari sem ásamt því að stunda golfkennslu er í mastersnámi í líftæknifræði.

Það kom því töluvert á óvart þegar að Woods tilkynnti um nýja þjálfara sinn sem hefur aðeins unnið með þremur kylfingum á PGA-mótaröðinni áður en það eru þeir Trevor Immelman, Richard Lee og Aaron Baddeley. Þeir hafa allir sagt að Como hafi hjálpað þeim töluvert enda sé hann mikill vísindamaður sem reynir að sníða sveifluna að líkamsbyggingu hvers kylfings sem hann kennir.

Það gæti vel verið að það sé nákvæmlega það sem Tiger Woods þarf á að halda, þar sem hann hefur átt í miklum meiðslavandræðum á undanförnum árum.

Woods hefur sagt við fréttamenn að hann og Como hugsi á svipaðan hátt um golfsveifluna og að samvinna þeirra hafi farið vel af stað en áhugavert verður að sjá hvort að sveifla þessa fyrrum besta kylfings heims muni breytast á komandi misserum.

Aðeins einn dagur er í endurkomu Tiger Woods á golfvöllinn eftir langt hlé en á morgun hefst Hero World Challenge mótið á Isleworth í Flórída þar sem aðeins 18 stigahæstu kylfingar heims hafa þátttökurétt. Mótið verður í beinni útsendingu á Golfstöðinni alla helgina en útsending frá fyrsta hring hefst klukkan 19:00 á morgun.