Dansarar hertaka Ingólfstorg

„Þetta er búið að vera frábært ferðalag og það er blessun að fá að vinna við það sem ég elska að gera,“ segir dansarinn Brynja Pétursdóttir en hún fagnar í dag tíu ára starfsafmæli og á sama tíma fagnar dansskólinn hennar tveggja ára afmæli.

Í því tilefni verður heljarinnar hátíð haldin á Ingólfstorgi þar sem boðið verður upp á sannkallaða dansveislu. „Þarna verða danssýningar frá frábærum dönsurum, þar á meðal Brynjari frá Ísland Got Talent, einnig sigurvegurum Reykjavík og Breiðholt Got Talent ásamt sigurvegurum Street-danseinvígisins og fleira,“ segir Brynja um dagskránna.

Þá verður gestum og gangandi boðið að taka þátt í fjörinu. „Fólk getur komið og dansað og notið góðrar tónlistar en svo er líka hægt að sitja í rólegheitunum og borða ís,“ bætir Brynja við létt í lundu.

Street-dans var ekki til á Íslandi fyrir tíu árum en senan stækkar ört hér á landi. „Ég þurfti að útskýra mikið hvað það var nákvæmlega sem ég kenndi því fólk þekkti ekki þessa dansstíla eða hafði ranga hugmynd um þá. Þetta eru vinsælustu dansstílar síðari ára á heimsvísu og þeir stílar sem einkenna myndbönd og sviðsatriði þekktra tónlistarmanna,“ bætir Brynja við. Sýningin hefst klukkan 14.00 á Ingólfstorgi.