Skemmtileg sýning og margslungin

„Gestir hafa sagt sýninguna vera bæði skemmtilega og margslungna enda hefur þeim gefist tækifæri til að taka þátt í sumum verkanna.“

Þetta segir Inga Jónsdóttir, safnstjóri Listasafns Árnesinga að Austurmörk 21 í Hveragerði, um sýninguna Snertipunkta sem samanstendur af verkum sjö íslenskra myndlistarmanna.

Þeir eru Anna Eyjólfsdóttir, Birgir Snæbjörn Birgisson, Helga Hjaltalín Eyjólfsson, Helgi Þorgils Friðjónsson, Ragnhildur Stefánsdóttir, Þórdís Alda Sigurðardóttir og Þuríður Sigurðardóttir.



 „Allir listamennirnir eiga það sameiginlegt að hafa verið virkir í íslensku listalífi og jafnframt skapað sér vettvang erlendis,“ segir Inga.

Dr. Margrét Elísabet Ólafsdóttir, list-og fagurfræðingur,  er sýningarstjóri Snertipunkta. Hún mun ræða við gesti um verkin þar á sunnudaginn, 31. ágúst, klukkan 15 en sýningin stendur til 14. september.

Listasafn Árnesinga er opið alla daga milli klukkan 12 og 18.

Aðgangur er ókeypis og góð aðstaða er fyrir börn.