Jólasjúk sópransöngkona í Hafnarborg

Hanna Þóra Guðbrandsdóttir sópran kemur fram á hádegistónleikum í Hafnarborg þriðjudaginn 2. desember kl. 12 ásamt Antoníu Hevesi píanóleikara. Tónleikarnir bera nafnið Maríustund en þar mun Hanna Þóra syngja ljóð, bænir og aríur sem tengjast heilagri Maríu og jólunum. „Hanna Þóra býr á Akranesi og er bæjarlistamaður Akraness núna. Hún er svo jólasjúk að hún verður búin að skreyta jólatréð og ætlar að gefa gestum tónleikanna uppskrift að jóladesert,“ segir Antonía.



Á efnisskránni eru Maríubænir og ljóð sem margir þekkja en eru með óvenjulegan bakgrunn sem Antonía ætlar að segja frá. Einnig verður eitt lag sem fáir hafa hlýtt á í þessu samhengi. Það var klippt út úr kvikmyndatónlist og talsvert amstur kostaði að ná í nóturnar að því, að sögn Antoníu.



Á meðal hlutverka sem Hanna Þóra hefur sungið má nefna Drekafluguna í Töfraheimi Prakkarans eftir Ravel, Genovefa úr Systir Angelicu eftir Puccini, greifynjuna í Brúðkaupi Fígarós eftir Mozart, og Ines í Il Trovatore eftir Verdi. Árið 2014 söng hún hlutverk daggarálfsins og Óla lokbrá í barnaóperunni Hans og Grétu á vegum Óp-hópsins og var einsöngvari í Óperunni Ragnheiði eftir þá Gunnar Þórðarson og Friðrik Erlingsson sem sett var upp af Íslensku óperunni og jafnframt fór hún með hlutverk í óperunni Skáldið og biskupsdóttirin eftir Alexöndru Chernyshova og Guðrúnu Ásmundsdóttur sem frumflutt var í Hallgrímskirkju í Saurbæ í vor.



Tónleikarnir hefjast klukkan 12 og standa yfir í um hálfa klukkustund, þeir eru öllum opnir á meðan húsrúm leyfir. Húsið verður opnað klukkan 11.30.