Ein besta sinfóníuhljómsveit heims leikur í Hörpu

London Philharmonic Orchestra mun koma fram á tvennum tónleikum í Hörpu dagana 18. og 19. desember klukkan 19.30. Á efnisskrá verður Fantasían um Thomas Tallis eftir Vaughan Williams, Sinfónía nr. 1 í g-moll op. 13 eftir Tsjajkovskí og hinn vinsæli píanókonsert nr. 5 í Es-dúr op. 73, einnig nefndur Keisarakonsertinn, eftir Beethoven.

Stjórnandi verður Osmo Vänskä sem var um árabil aðalstjórnandi Sinfóníuhljómsveitar Íslands. Osmo er tónlistarstjóri Minnesota Orchestra en sem gestastjórnandi hefur Osmo stjórnað öllum helstu hljómsveitum í Evrópu og Norður-Ameríku. Einleikari verður norski píanóleikarinn Leif Ove Andsnes sem nýlokið hefur við að hljóðrita alla píanókonserta meistarans.



London Philharmonic Orchestra var stofnuð af Sir Thomas Beecham árið 1932 og er í dag ein fremsta sinfóníuhljómsveit heims. Meðal aðalhljómsveitarstjóra LPO frá stofnun eru Sir Adrian Boult, Bernard Haitink, Sir Georg Solti, Klaus Tennstedt og Kurt Masur. Árið 2007 tók Vladimir Jurowsky við stöðu aðalhljómsveitarstjóra og hefur verið það síðan. Andrés Orozco-Estrada mun taka við stöðu aðalgestastjórnanda í september 2015.



Frá því að Royal Festival Hall, salur Southbank Centre í London, var byggður árið 1951 hefur London Philharmonic Orchestra haft þar aðalaðsetur og leikur 40 tónleika í salnum á hverju tónleikaári auk þess að koma reglulega fram bæði í Brighton og Eastbourne og fleiri stöðum á Bretlandseyjum. Á hverju ári er LPO í hlutverki óperuhljómsveitar á Glyndebourne Festival, þar sem hún hefur verið fastskipuð í yfir 50 ár. Hljómsveitin ferðast mikið um heiminn og á tónleikaárinu 2014-2015 fer hún víða um Evrópu, Bandaríkin og Kanada, auk Kína.