Snedeker og Jones taka forystuna á AT&T National

Bandaríkjamenn eru áberandi ofarlega á skortöflunni á AT&T Pebble Beach National mótinu eftir tvo hringi en Brandt Snedeker og Matt Jones leiða mótið á 12 höggum undir pari.

Snedeker lék sérstaklega vel á öðrum hring en hann hitti allar flatirnar á vellinum í áætluðum höggafjölda og virðist vera að spila sitt besta golf þessa dagana eftir misjafnt gengi á undanförnu ári.

Gríðarlega margir kylfingar eru stutt frá efstu mönnum en 36 keppendur eru á innan við fimm höggum frá efsta sætinu og því má búast við spennandi keppni um helgina.

Hinn vinsæli John Daly lék fyrsta hringinn á Pebble Beach á sjö höggum undir pari og var meðal efstu manna en honum tókst ekki að fylgja því eftir í gær. Hann kom inn á 72 höggum eða einu yfir pari og situr eins og er í 37. sæti á sex undir pari samtals.

Þriðji hringur verður í beinni útsendingu á Golfstöðinni og hefst útsending klukkan 18:00 í kvöld.