Gæsluvarðhald yfir konu sem grunuð er að hafa orðið sambýlismanni sínum að bana hefur verið framlengt um fjórar vikur. Sambýlismaður hennar fannst látinn á heimili þeirra við Skúlaskeið í Hafnarfirði 14. febrúar síðastliðinn og var konan handtekin á vettvangi.
Hún var úrskurðuð í vikulangt gæsluvarðhald degi síðar en það var framlengt um fjórar vikur í dag vegna almannahagsmuna að sögn Kristjáns Inga Kristjánssonar, aðstoðaryfirlögregluþjóns hjá lögreglunni á höfuðborgarsvæðinu.
Maðurinn var með eitt stungusár vinstra megin á brjóstholi og er talið að maðurinn hafi látist af völdum hnífsstungu. Ekki hafa fengist upplýsingar um hvers konar eggvopni var beitt við verknaðinn, hnífi, skærum eða öðru.
