Maldonado fljótastur á þriðja degi

Pastor Maldonado á Lotus náði besta tíma dagsins á þriðja degi æfinga í Barselóna.

Hinn ungi Max Verstappen á Toro Rosso varð annar eftir að hafa átt besta tíman mestan hluta dags. Lewis Hamilton varð þriðji á Mercedes, tæpum tveimur sekúndum á eftir Maldonado.

Sebastian Vettel missti stjórn á Ferrari bílnum og endaði í mölinni í morgun. Hann náði þó að aka 105 hringi. Hann átti góðan eftirmiðdag.

Jenson Button var hægastur á McLaren bílnum og ók skemmst allra, 24 hringi. Þétting gaf sig í vélinni og batt enda á daginn.

Maldonado setti sinn besta tíma á ofur mjúkum dekkjum, sem eru þau dekk sem gefa best grip. Svo virðist sem hann hafi farið af stað á brautina á tímabili einatt til þess að setja hraðan hring. Fæst eru liðin mikið að einblína á hraða í þessari æfingalotu heldur áreiðanleika.

Það skal þó ekki gleymast að nokkrar fyrirsagnir og smá umfjöllun í fjölmiðlum getur gert kraftaverk í söfnun styrktaraðila. Líklega er Lotus að leita að slíkum sem gæti útskýrt hvers vegna Maldonado lá á að komast hringinn á Katalóníubrautinni í dag.