Sóðaleg sítróna

Sítrónur geta gert næstum allt!

Það er hægt að þrífa heimilið með þeim, baka og elda kræsingar með þeim, nota bæði börkinn og safann til að hreinsa líkama og hár.

Það mætti draga af því ályktun að sítrónur væru ómissandi inni á hverju heimili en þær eru einnig vinsælar á börum og veitingastöðum og skreyta gjarnan drykki.

Nýlega var gerð rannsókn á sítrónum sem veitingastaðir bjóða upp á og var sérstaklega kannað hversu hreinar sítrónurnar væru.

Í ljós kom að sítrónurnar voru með ótrúlegt magn af allskyns gerlum, þar á meðal saurgerlum því barþjónar sem meðhöndla sítrónurnar hafa oft ekki þvegið þær fyrir notkun þeirra. (og auðvitað kannski gleymt að sápa sig eftir salernisferð) En gerlar gátu einnig stafað af krossmengun við önnur matvæli.

Þessir gerlar geta verið misskaðlegir og fer það eftir einstaklingum.

Svipaða sögu af ýmsum gerlum má segja af ísmolum úr klakavélum.

Því er mikilvægt að hreinsa vel sítrónurnar áður en þær eru notaðir í drykki eða matargerð.

Mælt er með að hreinsa hendurnar fyrst og svo skola sítrónurnar upp úr köldu vatni og skrúbba með bursta (til dæmis er hægt að nota bursta sem skrúbbar kartöflur eða gulrætur með).

Gott er að þurrka þær svo með hreinu viskastykki.