Bílskúrinn: Mercedes-menn malaðir í Malasíu

Eftir keppnina í Malasíu er ljóst að Ferrari ætlar ekki að gefa Mercedes neitt eftir.

Sebastian Vettel vann en Kimi Raikkonen var hiklaust maður keppninnar. Ferrari menn voru því í heildina litið með allt á hreinu í Malasíu.

Farið verður yfir helstu atburði helgarinnar hér í Bílskúrnum, léttu hliðinni á Formúlu 1 hér á Vísi.

Framfarir Ferrari

Teikn voru á lofti um möguleika Ferrari strax á föstudagsæfingum. Liðið gat bæði sett góða tíma á hörðum og meðalhörðum dekkjunum.

Mercedes menn sýndu veikleika í sinni keppnisáætlun strax í fyrstu lotu tímatökunnar þegar þeir fóru strax út á meðalhörðum dekkjum. Þá var ljóst að þeir vildu frekar nota hörð dekk í keppninni og voru líklega að reikna með þremur stoppum í keppninni. Þeir hefðu auðveldlega komist áfram úr fyrstu lotunni á hörðum dekkjum en völdu meðalhörð til að spara hörðu dekkin.

Vettel hafði þegar sýnt að Ferrari bíllinn væri ekki alveg getulaus. Hann landaði þriðja sæti í Ástralíu en það óraði engan fyrir því að Ferrari myndi skáka Mercedes alveg strax. Ferrari tókst að fara betur með dekkinn í Malasíu og að aka hraðar en Mercedes.

Vettel er því fyrstur til að rjúfa drottnun Mercedes manna á jafnréttisgrundvelli. Daniel Ricciardo sem vann þær þrjár keppni sem Mercedes tókst ekki að vinna í fyrra, tókst það einungis þegar Mercedes bílarnir biluðu eða ökumenn liðsins þvældust hver fyrir öðrum.

Misktök Mercedes

Hvað gerði Mercedes rangt? Liðið nýtti tækifærið þegar öryggisbíllinn kom út í byrjun keppninnar til að skipta um dekk. Vettel gerði það hins vegar ekki og leiddi því keppnina. Umferðin þvældist fyrir Lewis Hamilton og Nico Rosberg í dágóða stund, það voru mistök númer eitt.

Hin mistökin voru að reyna að fara eins langt og hægt var á hverjum dekkjagang, jafnvel þótt striginn einn væri eftir. Hinn valkosturinn er að aka á dekkjunum þangað til þau hætta að virka vel. Þá þarf vissulega að stoppa oftar en það hefði hugsanlega getað bjargað fyrsta sætinu.

„Þetta er kannski bara vekjaraklukkan sem við þurftum,“ sagði Toto Wolff, keppnisstjóri Mercedes eftir keppnina.

Hvað kom fyrir hjá Manor

Orðrómur um að liðið geti bara notað annan bílinn í einu hefur komist á kreik. Ástæðan er sú að bílarnir hafa aldrei verið báðir á braut í einu. Graeme Lowdon, liðsstjóri Manor segir það ekki rétt.

Hann segir að ástæðan fyrir því að liðið hafi einungis haft einn bíl í einu á brautinni á æfingum hafi verið til að minnka líkur á mistökum við framkvæmdir og verkefni tengd bílunum.

Vandamáli Will Stevens var lýst sem „flókinni bilun í eldsneytiskerfi.“

„Ef bíllinn hefði hreyfst úr stað, hefði hann verið með í keppninni. Það er engin spurning um það og hann hefði tekið þátt í tímatökunni,“ bætti Lowdon við.

Vonandi mætir Manor með tvo bíla bæði í tímatöku og keppni í Kína.

Maður keppninnar

Kimi Raikkonen á þann heiður í þetta skipti. Hann lenti í samstuði strax á fyrsta hring sem varð til þess að það sprakk dekk hjá honum.

Raikkonen haltraði þá heim á þjónustusvæði og fékk ný dekk undir. Hann var þá lang síðastur. Öryggisbíllinn sem kom út snemma í keppninni hjálpaði Finnanum vissulega. Hann átti afbragðs keppni og þegar yfir lauk var Raikkonen orðinn fjórði en var um tíma í þriðja sæti.

Þessi árangur hans og geta til að tæta í gegnum þvöguna er helst til frekari sönnunar um getu Ferrari bílsins.

Er baráttan virkilega hafin?

Einokun Mercedes manna á efsta þrepi verðlaunapallsins í fyrra var nánast algjör. Einungis Ricciardo kom í veg fyrir að hún væri fullkomnuð.

Nú þegar tveimur keppnum er lokið er ljóst að Ferrari ætlar að minnsta kosti ekki að leggjast alveg killiflatt og láta Mercedes valta yfir sig og alla aðra.

Líklega er þó skýring á skyndilegum framförum Ferrari. Vænta má að Mercedes haldi einhverju forskoti í kaldari aðstæðum og á brautum þar sem minna máli skiptir að spara dekkin. Kína er dæmi um kaldari braut og þar slitna dekkin ekki eins hratt.

Næsta keppni mun því leiða í ljós hvort Ferrari eigi raunverulega möguleika á að berjast við Mercedes eða hvort Malasíu mölunin var einstakt tilfelli á mótaskránni 2015.