Alfreð kom Sociedad á bragðið gegn Levante

Alfreð Finnbogason skoraði eitt marka Real Sociedad í 3-0 sigri liðsins á Levante á heimavelli í spænsku úrvalsdeildinni í fótbolta í kvöld.

Alfreð kom Sociedad yfir á 13. mínútu með skoti af stuttu færi eftir sendingu frá Yuri. Þetta var annað deildarmark íslenska landsliðsmannsins í deildinni í vetur og hans fjórða fyrir Sociedad í öllum keppnum.

Markel Bergara kom Böskunum í 2-0 á 51. mínútu og mexíkóski framherjinn Carlos Vela gulltryggði svo sigurinn með þriðja markinu fjórum mínútum fyrir leikslok.

Þetta var fyrsti sigur Sociedad í deildinni síðan liðið lagði Cordoba að velli, 3-0, 22. mars en Alfreð skoraði einmitt í þeim leik.

Alfreð og félagar eru í 11. sæti deildarinnar með 43 stig.