Valsmenn ráða fimmfaldan Íslandsmeistara sem aðstoðarþjálfara

Ásta Árnadóttir er nýr aðstoðarþjálfari Vals í meistaraflokki kvenna í knattspyrnu en hún fékk stöðuhækkun eftir að hafa verið fyrst sjúkraþjálfari Valsliðsins.

Ásta mun aðstoða Ólaf Brynjólfsson sem er á sínu fyrsta tímabilið með Valsliðið en hann tók við liðinu af Þór Hinrikssyni.  

„Ásta Árnadóttir hefur verið ráðin aðstoðarþjálfari meistaraflokks kvenna í knattspyrnu. Ásta kom inn í þjálfarateymið sem sjúkraþjálfari og verið afar mikilvægur hlekkur innan hópsins. Ásta mun því miðla af allri sinni reynslu og þekkingu til leikmannahópsins á komandi tímabili," segir í fréttatilkynningu frá Valsmönnum.

Ásta Árnadóttir varð fimm sinnum Íslandsmeistari með Valsliðinu á sínum tíma en hún á að baki alls 75 leiki í efstu deild fyrir Val.

„Ekki þarf að kynna knattspyrnukonuna Ástu Árnadóttur fyrir Völsurum. Þetta er einhver mesta baráttukona sem við höfum átt í okkar herbúðum, jákvæðni hennar og leikgleði sást, og sést langar leiðir. Hún var leikmaður sem skyldi allt eftir á vellinum," segir í fréttatilkynningu Valsmanna.

Ásta lék sinn síðasta leik með Val sumarið 2010 en það er einmitt síðasta tímabilið sem liðið vann Íslandsmeistaratitilinn. Hún á að baki 36 A-landsleiki á Valsárunum 2004 til 2009.

„Reynsla og ástríða Ástu fyrir leiknum verður ómetanlegt vopn í sumar hjá kvennaliði Vals sem sannarlega er í mótun og þarf ámiklum stuðningi Valsara að halda. Ólafur og Ásta eru gríðarlega hæft þjálfarateymi og jafnframt einstaklega miklir Valsarar sem gera kröfur til þeirra leikmanna sem klæðast búningi félagsins," segir í fréttatilkynningu Valsmanna.

Valsliðinu var spáð sjöunda sætinu í Pepsi-deildinni í sumar en fyrsti leikur liðsins er á móti Aftureldingu á fimmtudaginn.