KR náði í stig í Kópavogi | Valur með fullt hús

Valur vann Fylki, 3-1, Pepsi-deild kvenna í fótbolta í kvöld og er á toppi deildarinnar með níu stig eða fullt hús eftir þrjár umferðir.

Elín Metta Jensen kom Val í 1-0 í kvöld áður en Sandra Sif Magnúsdóttir jafnaði metin á 50. mínútu, 1-1.

Vesna Smiljkovic og Katia Maanene tryggðu Val öll þrjú stigin með sitthvoru markinu á 57. og 79. mínútu leiksins. Flott byrjun á Val í sumar.

Fylkisliðið er með þrjú stig í sjöunda sæti deildarinnar, en það vann Selfoss í fyrstu umferðinni og hefur síðan tapað tveimur leikjum í röð.

Nýliðar KR gerðu góða ferð í Kópavoginn og náðu þar í stig gegn firnasterku liði Breiðabliks með 1-1 jafntefli.

Margrét María Hólmarsdóttir kom gestunum yfir á 70. mínútu, en Fanndís Friðriksdóttir bjargaði stigi fyrir Blika með jöfnunarmarki á 87. mínútu.

Blikar eru í öðru sæti deildarinnarm eð sjö stig en KR er í áttunda sæti með þetta eina stig sem liðið náði í kvöld.