Stólarnir fá Kana og nýjan aðstoðarþjálfara

Tindastóll hefur fengið til sín nýjan bandarískan leikmann fyrir komandi tímabil og því ljóst að Myron Dempsey spilar ekki aftur með liðinu í vetur.

Stólarnir eru búnir að ganga frá samningi við Darren Townes, framherja sem spilað hefur í Finnlandi, Portúgal og á Írlandi. Það er feykir.is sem greinir frá þessu.

Townes er fæddur 1986 og er 202 cm á hæð. Hann er sagður sterkur alhliða leikmaður sem nýr þjálfari Stólanna, Finninn Pieti Poikola, þekkir vel til.

Tindastóll er einnig búið að semja á ný við íslensku Bandaríkjamennina Darrel Lewis og Darrel Flake þannig silfurliðið frá síðasta ári kemur vel mannað til leiks á ný.

Feykir.is greinir einnig frá því að hinn þrautreyndi Kári Marísson, sem var aðstoðarþjálfari Tindastóls á síðustu leiktíð, stígur til hliðar og verður nýjum þjálfara ekki til aðstoðar í vetur.

Poikola sótti aðstoðarþjálfara sinn hjá danska landsliðinu, Harri Mannonen, og sjá þeir um Tindastólsliðið á næstu leiktíð í Dominos-deildinni.

Tilþrif með Darren Townes frá síðustu leiktíð: