Hættu við félagsskipti vegna Twitter-færslu leikmanns

Deportivo La Coruna hætti nýlega við kaup á spænska leikmanninum Julio Rey eftir að hafa komist að samkomulagi við félag hans og hann sjálfan um að hann gengi til liðs við Deportivo.

Rey sem leikur með Arosa SC í spænsku 3. deildinni skrifaði á Twitter-aðgang sinn fyrir þremur árum „Puta Deportivo,“ sem er hægt að skilja sem til fjandans með Deportivo. Upp komst um þetta þegar starfsmenn Deportivo fóru að grandskoða bakgrunn leikmannsins á internetinu.

Þrátt fyrir að hafa komist að samkomulagi hefur Deportivo ákveðið að hætta við félagsskiptin á síðustu stundu og greindu frá því að þeir vildu aðeins fá leikmenn sem sýndu virðingu fyrir félaginu, gildi þeirra sem og mótherjum þeirra. Julio Rey hefur nú eytt Twitter-aðgangi sínum.