Gærdagurinn gaf 173 laxa í Ytri Rangá

Ytri Rangá hefur verið í feykna góðum gír síðustu daga og það er óhætt að tala um að mokveiði sé í ánni.

Sem dæmi um þessa ótrúlegu veiði skilaði gærdagurinn einn samtals 173 löxum á land og mikið slapp af hjá sumum mönnum eins og gengur og gerist. Gífurlega kraftmiklar göngur eru í ánna sem sést best á því að svo til allir staðir neðan við Ægissíðufoss eru hreinlega pakkaðir af laxi. Allir helstu veiðistaðir eru inni en sumir þó eins og endranær gjöfulli en aðrir.

Það virðist sem toppnum á göngunum sé ekki enn náð og miðað við það og þann gang mála í ánni síðustu daga á veiðin líklega eftir að tvöfaldast áður en veiðitímanum líkur í október. Ennþá er eingöngu veitt á flugu en annað agn fer aftur í ánna um miðjan september. Heildarveiðin í gærkvöldi stóð í 3026 löxum svo það er ekkert óhugsandi að hún gæti jafnvel náð 7000 löxum. Samkvæmt leigutakanum eru lausar stangir á stangli og það hljóta að vera með eftirsóttustu veiðileyfunum í dag miðað við hvað veiðin í ánni er góð.