Sauber staðfestir ökumenn snemma

Sauber ætlar að halda báðum ökumönnum sínum á næsta ári. Liðið hefur tilkynnt þetta til að forðast óþarfa slúður og kjaftasögur.

Bæði Felipe Nasr og Marcus Ericsson hafa skrifað undir samning sem tryggir þeim sæti hjá Sauber liðinu á næsta ári.

Sauber er óvenju snemma í samningsgerð við ökumenn. Markmiðið er að koma í veg fyrir kjánalæti undir lok tímabilsins þar sem kjaftasögur fara á flug.

„Þetta færir okkur ákveðinn stöðugleika og róar allt niður. Það er svo mikið um kjaftasögur og ökumenn okkar eru spurðir spurninga og vita ekki hvað þeir geta sagt um óráðna framtíð,“ sagði Monisha Kaltenborn, liðsstjóri Sauber.

„Þetta skýrir stöðuna og nú vita allir sína stöðu og geta látið getgátur og blaður sem vind um eyru þjóta,“ bætti Kaltenborn við.

Sauber var í vondri stöðu í upphafi tímabils þar sem Giedo Van der Garde taldi sig samningsbundinn liðinu, ásamt Nasr og Ericsson. Van der Garde mætti til Ástralíu með það fyrir augum að aka í keppninni. Málið fór fyrir dómstól í Ástralíu en endaði með samkomulagi milli aðila.

Sauber vill augljóslega forðast aðra slíka uppákomu með því að afgreiða málið snemma í ár.