Ramos fór úr axlarlið í gær

Real Madrid staðfesti í dag að spænski varnarmaðurinn Sergio Ramos hefði farið úr axlarlið í 4-0 sigrinum á Shaktar Donetsk í gær. Ramos var einn þriggja leikmanna liðsins sem fór meiddur af velli í gær.

Ramos var að vanda í byrjunarliði Real Madrid í gær og bar fyrirliðabandið en kom meiddur af velli eftir klukkutímaleik en stuttu áður var lenti hann í groddaralegri tæklingu frá Taras Stepanenko í liði Shaktar.

Ásamt Ramos fóru Gareth Bale og Raphael Varane meiddir af velli hjá Real Madrid í leiknum. Samkvæmt staðarblaðinu Marca verður Ramos frá í tvær vikur en óvíst er hvenær Bale og Varane verða klárir í slaginn á ný.

Mun hann því líklegast missa af leikjum gegn Granada, Athletic Bilbao og Malaga en ætti að vera klár í tæka tíð fyrir leik liðsins gegn Kára Árnasyni og félögum í Malmö í Meistaradeildinni eftir tvær vikur.