Messi kom af bekknum og skoraði sigurmarkið

Lionel Messi reyndist hetja Barcelona einu sinni sem oftar í kvöld þegar hann skoraði sigurmarkið gegn Atletico Madrid í stórleik umferðarinnar í spænsku úrvalsdeildinni.

Fernando Torres kom heimamönnum yfir með laglegu marki á 51. mínútu, en hann fékk þá góða stungusendingu inn fyrir vörn Barcelona frá Tiago.

Neymar jafnaði metin fyrir gestina með stórkostlegu marki beint úr aukaspyrnu og það var svo nýbakaði faðirinn Lionel Messi sem skoraði sigurmarkið þrettán mínútum fyrir leikslok.

Messi byrjaði á bekknum, en hann eignaðist sitt annað barn á dögunum. Hann kom svo inná á 60. mínútu og skoraði, eins og áður segir, sigurmarkið eftir samspil við Luis Suarez.

Barcelona er því með fullt hús stiga eftir leikina þrjá sem búnir eru, en þetta var fyrsta tap Atletico Madrid í fyrstu þremur leikjum sínum.