Dortmund bætti sig fyrstu fjögur tímabilin undir stjórn Klopp

Jürgen Klopp er nýr knattspyrnustjóri Liverpool en þessi fyrrum þjálfari Borussia Dortmund er búinn að skrifa undir þriggja ára samning við enska úrvalsdeildarliðið.

Klopp skrifaði undir samninginn í gær og hélt sinn fyrsta blaðamannafund í dag.

Klopp tók við liði Borussia Dortmund sumarið 2008 en tímabilið á undan hafði liðið aðeins náð 13. sæti undir stjórn Thomas Doll. Það var versti árangur liðsins í tvo áratugi.

Borussia Dortmund bætti árangur sinn á fyrstu fjórum tímabilunum undir stjórn Jürgen Klopp.

Fyrsta tímabilið hækkaði Dortmund-liðið sig um heil sjö sæti í töflunni, fór úr 13. sæti í 6. sæti. Tímabilið á eftir náði liðið 5. sæti og vann sér sæti í Evrópudeildinni.

Dortmund varð síðan þýskur meistari á hans þriðja tímabili og vann sér sæti í Meistaradeildinni.  

Fjórða tímabilið vann Dortmund síðan tvöfalt það er varð bæði þýskur meistari og þýskur bikarmeistari.

Hér fyrir neðan má sjá stutt yfirlit yfir gengi Borussia Dortmund í þýsku deildinni þessi sjö tímabil Jürgen Klopp með Borussia Dortmund.



Ár Jürgen Klopp með Borussia Dortmund:

Tímabilin fyrir komu Klopp:

2006-07: 9. sæti

2007-08: 13. sæti

Tímabilin með Klopp:

Fyrsta tímabilið 2008-09: 6. sæti

Annað tímabilið 2009-10: sæti

Þriðja tímabilið 2010-11: 1. sæti

Fjórða tímabilið 2011-12: 1. sæti og bikarmeistari

Fimmta tímabilið 2012-13: 2. sæti

Sjötta tímabilið 2013-14: 2. sæti og 2. sæti í bikar

Sjöunda tímabilið 2014-15:  7. sæti og 2. sæti í bikar