Skaut í átt að óléttri unnustu sinni

Deiondre Porter spilar væntanlega ekki meira með Flórída-háskólanum í vetur eftir að hafa skotið úr byssu að óléttri unnustu sinni.

Hann sakaði unnustuna um að halda við liðsfélaga sinn og brást við á þennan hátt.

Hann er eðlilega kominn í fangelsi og skólinn hefur sett hann í ótímabundið bann. Porter er nýliði hjá þessu sterka háskólaliði.

Það vantar annars ekki agavandamálin hjá Florida. Þetta atvik kom upp aðeins tveim dögum eftir að leikstjórnandinn Will Grier var settur í eins árs bann fyrir ólöglega lyfjanotkun.

Þriðji leikmaður liðsins var svo handtekinn fyrir nokkrum mánuðum síðan en hann rændi búð með byssu að vopni. Sá hefur verið rekinn úr skólanum.