Benzema frá næstu vikurnar

Karim Benzema, framherji Real Madrid og franska landsliðsins, verður frá næstu þrjár vikurnar eftir að hafa farið meiddur af velli í æfingarleik Frakklands og Armeníu á fimmtudaginn.

Benzema hefur byrjað tímabilið af krafti en hann hefur skorað sex mörk í fyrstu sjö leikjum félagsins á þessu tímabili, þar á meðal eina mark liðsins í nágrannaslagnum gegn Atletico Madrid um síðustu helgi.

Fór Benzema meiddur af velli á 81. mínútu en hann hafði stuttu áður skorað tvö mörk, hans fyrstu í frönsku landsliðstreyjunni í tæplega eitt ár.

Real Madrid staðfesti í gær að það hefði komið í ljós við myndatöku að Benzema væri meiddur aftan í vinstra lærinu og að hann yrði frá næstu þrjár vikurnar.

Þýðir það að hann mun missa af leikjum gegn Levante, Celta Vigo og Las Palmas auk þess sem hann mun missa af leikjunum gegn Paris Saint-Germain í Meistaradeild Evrópu.