Hafa tapað öllum leikjunum en eru samt með bestu vörnina

Tölfræði segir sjaldan alla söguna og stundum bara allt aðra sögu eins og í tilfelli nýliða Hattar í fyrstu þremur umferðum Domino´s deildar karla í körfubolta.

Hattarmenn sitja á botni deildarinnar eftir þrjá leiki þar sem þeir hafa tapað fyrir Njarðvík, Grindavík og Snæfelli í fyrstu þremur umferðum tímabilsins.

Höttur er án stiga eins og hinir nýliðarnir í FSu en Hattarmenn hafa verra stigahlutfall og sitja því í botnsætinu.

Höttur er hinsvegar með bestu vörnina samkvæmt tölfræðinni því liðið hefur fengið fæst stig á sig að meðaltali í leik af öllum tólf liðum deildarinnar.

Höttur hefur fengið á sig 224 stig í þessum þremur leikjum eða aðeins 74,7 stig að meðaltali í leik.

Hér munar vissulega um það að Snæfellingar skoruðu bara 62 stig á þá í síðasta leik en stigin 62 dugðu engu að síður Hólmurum til að taka öll stigin með sér heim.

Vörn Hattarmanna hefur verið einstaklega öflug í fyrri hálfleiknum þar sem liðið hefur enn ekki fengið á sig 100 stig. Mótherjar Hattar hafa skorað 99 stig í fyrri hálfleik í leikjunum þremur eða 33,3 að meðaltali í leik.

Snæfell er með næstbestu vörnina (76,7 stig á sig í leik) og KR-ingar eru síðan í þriðja sæti (79,0 stig á sig í leik).

Það eru aðeins búnir þrír leikir og því er varla hægt að taka mikið á þeim en það breytir því ekki að það er afar sérstakt að liðið sem hefur fengið fæst stig á sig í leik sitji án sigurs í neðsta sæti deildarinnar.