Hamilton: Ég hugsaði svo oft að ég væri búinn að tapa keppninni

Lewis Hamilton kom í mark sem þrefaldur heimsmeistari í Texas eftir mikla spennu í keppninni og mikil átök við náttúruöflin um helgina. Hver sagði hvað eftir keppnina?

„Ég elska liðið mitt, ég hefði aldrei getað gert þetta án ykkar. Takk fyrir stuðninginn. Ég vil þakka föður mínum og fjölskyldu sem hafa fórnað ýmsu til að koma mér hingað. Ég hugsaði svo oft að ég væri búinn að tapa keppninni,“ sagði Lewis Hamilton þrefaldur heimsmeistari í Formúlu 1.

„Ég er auðvitað vonsvikinn. Ég veit ekki hvað klikkað. Ég vil þakka áhorfendum hér fyrir að halda út í rigningunni,“ sagði Nico Rosberg á verðlaunapallinum, hann var ekki reiðubúinn til að taka þátt í gleðinni með Hamilton.

Rosberg hefur væntanlega verið að fara yfir mistökin sem kostuðu hann nánast unna keppni. Hann spólaði og missti Hamilton fram úr sér undir lokin.

„Þetta hefur aldrei komið fyrir mig áður, svona spól. Ég var í góðum gír og ég veit ekkert hvernig þetta gerðist. Ég vil meina að Lewis hafi snert mig í fyrstu beygju en ég veit ekki hvað ég má segja núna,“ bætti grautfúll Rosberg við.

Rosberg var að minnsta kosti ekki í skapi til að láta Hamilton kasta til sín derhúfunni sem Rosberg átti að vera með á verðlaunapallinum. Hann henti henni til baka í Hamilton.

„Við erum að nálgast Mercedes en ég vil óska Lewis til hamingju, við verðum þarna á næsta ári. Það er ekki gaman að standa hérna þegar ég get ekki orðið meistari lengur. Þetta var samt skemmtileg keppni,“ sagði Sebastian Vettel á verðlaunapallinum.

„Ég get ekki kvartað, þetta var besta keppni sem ég hef séð. Núna er hann orðinn eins góður og ég,“ sagði Niki Lauda í léttum tón. Hann bætti svo við að Hamilton eigi eftir að vinna fleiri titla.

„Þetta er agjörlega liðssigur, það standa 1200 manns á bak við liðið. Ég er ekki búinn að tala við Nico (Rosberg) en ég fer að reyna að kæta hann. Auðvitað er hann vonsvikinn. Það voru svo margar breytur í þessari keppni. Það var svo margt sem réð úrslitunum,“ sagði Toto Wolff, keppnisstjóri Mercedes.

„Það þarf svo margt að smella saman til að láta Formúlu 1 liði ganga vel. Við höfum mikið af gríðarlega kláru fólki hjá okkur sem hefur gert gríðarlega vel til að gera bílinn svona góðan. Lewis væri ekki þar sem hann er ef Nico væri ekki í liðinu,“ sagði Paddy Lowe, tæknistjóri Mercedes.

„Allir góðir ökumenn aka á sama máta, þeir eru alltaf að læra og þeir aðlaga sig aðstæðum sem þeir eru kannski ekki ánægðir með. Lewis er núna farinn að aðlaga sig. Hann er að þroskast. Hann er alltaf spennandi að fylgjast með,“ sagði Jackie Stewart, þrefaldur heimsmeistari í Formúlu 1.