Þótti ekki ástæða til að fara fram á gæsluvarðhald yfir sakborningum

Ekki voru forsendur fyrir því að úrskurða mennina tvo sem grunaðir eru um nauðgun í Hlíðarhverfinu í gæsluvarðhald, segir Árni Þór Sigmundsson, yfirmaður kynferðisafbrotadeildar lögreglunnar á höfuðborgarsvæðinu.

Sjá einnig: Nauðgunarmál í HR: Bæði atvikin að lokinni skólaskemmtun í miðbæ Reykjavíkur

Hefur þessi ákvörðun vakið hörð viðbrögð netverja og margir sótt hart að lögreglunni á höfuðborgarsvæðinu á Facebook-síðu hennar vegna málsins.

Kæra lögregla á höfuðborgarsvæðinu. Sem almennur borgari, sem er þess utan kvenkyns og þ.a.l. í stærri áhættuhóp fyrir...

Posted by Þórdís Elva Þorvaldsdóttir on Monday, November 9, 2015

Enn með stöðu sakborninga

Árni Þór segir mennina hafa verið í haldi lögreglu í sólarhring á meðan frumrannsókn málanna fór fram. Gerði lögreglan meðal annars húsleit í fjölbýlishúsi í Reykjavík á dögunum þar sem talið er að tvær árásir hafi í tveimur aðskildum kynferðisbrotamálum hafi átt sér stað.

Var mönnunum sleppt úr haldi þegar þau atriði sem voru rannsakanleg voru komin fram. Því var ekki hægt að fara fram á gæsluvarðhald út frá rannsóknarhagsmunum, að sögn Árna Þórs.

Sjá einnig: Lögregla gerði húsleit í íbúð í Hlíðunum

Var málið metið af fulltrúum ákærusviðs lögreglunnar á höfuðborgarsvæðinu í samræmi við framvindu rannsóknarinnar og var það metið svo að ekki væri hægt að úrskurða sakborningana í gæsluvarðhald út frá rannsóknarhagsmunum eða almannahagsmunum.

Eru mennirnir þó enn með stöðu sakborninga.

Heimild til gæsluvarðhalds ef brotið varðar meira en 10 ára fangelsisvist

Í 95. grein laga um meðferð sakamála kemur fram að sakborningur verði aðeins úrskurðaður í gæsluvarðhald ef rökstuddur grunur sé um að hann hafi gerst sekur um háttsemi sem fangelsisrefsing er lögð við. Auk þess verður að vera fyrir hendi eitthvert eftirtalinna skilyrða:

Ætla megi að sakborningur muni torvelda rannsókn málsins, svo sem með því að afmá merki eftir brot, skjóta undan munum eða hafa áhrif á samseka eða vitni.

Þá má einnig úrskurða sakborninga í gæsluvarðhald ef ætla megi að hann muni halda áfram brotum meðan máli hans er ekki lokið eða rökstuddur grunur leiki á að hann hafi rofið í verulegum atriðum skilyrði sem honum hafa verið sett í skilorðsbundnum dómi. Einnig má úrskurða sakborninga í gæsluvarðhald ef það er talið nauðsynlegt til að verja aðra fyrir árásum sakbornings eða hann sjálfan fyrir árásum eða áhrifum annarra manna.

Ef ekkert þessara atriði er uppfyllt má hins vegar úrskurða sakborninga í gæsluvarðhald ef grunur leikur á að hann hafi framið afbrot sem að lögum getur varðað 10 ára fangelsi, enda sé brotið þess eðlis að ætla megi varðhald nauðsynlegt með tilliti til almannahagsmuna. Nauðgunarbrot getur varðað allt að sextán ára fangelsi samkvæmt almennum hegningarlögum.

Sakborningar eru frjálsir ferða sinna nema þeir séu úrskurðaðir í farbann. Ekki var farið fram á farbann yfir sakborningum í málinu.