"Hvernig getur þetta farið fyrir brjóstið á ykkur?“ spyr Anna Birta

„Ég gekk hugsi með barnið mitt að leikskólanum og furðaði mig áhuga og hatri landsmanna í minn garð. Ég bað leikskólakennarann að ræða ekki um líflát mitt í fjölmiðlum fyrir framan dóttur mína,“ skrifar Anna Birta Lionaraki í Facebook-færslu. Færslunni hefur nú verið eytt af vefnum.

Ástæða færslunnar er umræða í kjölfar skyggnilýsingarfunds sem hún hélt á sunnudagskvöld. Meðal gesta var Frosti Logason, annar umsjónarmanna Harmageddon, en hann gerði upplifun sína að umtalsefni í þætti sínum daginn eftir. Sagði hann Önnu Birtu meðal annars ráðist að sér persónulega á fundinum.

Frosti og Anna mættust síðan í umræðu í Ísland í dag á mánudagskvöld þar sem Frosti sagði meðal annars að honum þætti óskiljanlegt að Anna legði það fyrir sig að hafa svona svik að atvinnu. Talsverð umræða spratt upp í kjölfar alls þessa.

Sjá einnig: Ég heiti Anna Birta og ég er miðill

„Að vera eða vera ekki miðill. Elskulega fólk, þið sem hafið nú af áfergju talað um mína persónu og ekki hlíft mér við ykkar heift vil ég koma þessu áleiðis. Hvernig getur þetta farið svona fyrir brjóstið á ykkur?“ spyr Anna Birta.

Hún segir að áður en hún hafi farið að sjá hafi hún verið eins og allir aðrir. Hún spyr hvernig vinnan sín geti talist óheiðarleg í landi þar sem þjóðkirkjan hefur blómstrað í gegnum skattfé landsmanna.

„Tökum presta sem dæmi. Þeir vinna í húsi Guðs, en fá borgað frá ríkinu. Þeir trúa á himnaríki, hugsanlegt heimili Guðs og félaga hans. Þeir predika að það sé til líf eftir þetta líf og í jarðarförum hugga þeir fólk og benda á það að Jesú og englar Guðs passi upp á fólkið okkar eftir dauðann. Sem mér finnst gott og blessað. [...] Prestarnir mega trúa á Guð og að sálir þeirra framliðnu finni gyllta hliðið en, þeir mega bara ekki ‚,sjá‘‘ þau,“ segir í pistli Önnu.

Sjá einnig: Frosti við Önnu miðil: Fáðu þér heiðarlega vinnu

Anna tekur fram að hún sé langt frá því að vera eini miðillinn og hún muni halda áfram að miðla. Henni þykir afar merkilegt að lítið sé talað um vinnu annarra miðla og til að mynda vinnu þeirra í lögreglumálum.

Sjáandinn segist miðla fyrir konurnar og mennina sem hefur verið nauðgað og ekki fengið aðhlynningu. Hún miðlar fyrir innflytjandann sem breytti nafninu sínu til að sleppa við aðkast, konur sem beittar hafa verið heimilisofbeldi og handanheimsfólkið sem svipti sig lífi og vill biðjast afsökunar á því.

„Ég hef verið orðið fyrir ofbeldi, ég hef verið kynferðislega misnotuð, ég fékk fæðingarþunglyndi og svo nýlega var gerð tilraun til að gera mig útlæga úr samfélaginu fyrir að vera skyggn. Þetta eru upplýsingarnar um mig sem þið funduð ekki á netinu. Ég er ekki að deila þessu til þess að fá meðaumkun en vinnan mín sem miðill er miklu meira en að tala bara við hina framliðnu,“ skrifar Anna Birta.

„Ég veit ekki með ykkur en mér finnst rétt að fá borgað fyrir vinnuna mína ekki bara af því ad eg er mjög góð í henni. Við búum í samfélagi þar sem við notum pening sem gjaldmiðil, af hverju er ég saknæm fyrir að bera virðingu fyrir tímanum mínum? Ég veit ekki til þess að prestar bjóði fólki endurgreiðslu ef því líkar ekki huggun þeirra og ég efast um að Frosti bjóði endurgreiðslu fyrir tilraun til mannorðsmorðs. [...] Ég sá einu sinni viðtal við miðil sem sagði að miðilsgáfan væri gjöf. Ég var ekki sammála fyrr en núna. Takk Frosti fyrir að minna mig á eigið ágæti og opna á svona þarfa umræðu,“ segir hún í niðurlagi pistilsins.

Til þeirra sem málið varðar. Árið er 2015, ég bý í vesturbænum og ég vakna með sviða í fótunum. Ég finn eldglæður en það...

Posted by Anna Birta Lionaraki on Wednesday, 4 November 2015