Rassía gerð í höfuðstöðvum þýska knattspyrnusambandsins

Þýsk skattayfirvöld og lögreglan í Frankfurt stóðu í morgun fyrir umsvifamiklum aðgerðum í tengslum við spillingarrannsókn í tengslum við HM 2006 í knattspyrnu, sem haldið var í Þýskalandi.

Undanfarnar vikur hafa ásakanir þess efnis komið fram að Þjóðverjar hafi keypt atkvæði þegar kosið var um hvar ætti að halda HM í knattspyrnu árið 2006.

Rassía var gerð í höfuðstöðvum þýska knattspyrnusambandsins sem og á heimilum þeirra Wolfgang Niersbach, formanni sambandsins, og Theo Zwanziger sem sat í skipulagsnefnd HM 2006.

Þeir Niersbach og Zwanziger eru grunaðir um skattsvik í tengslum við háa peningagreiðslu til Alþjóðaknattspyrnusambandsins, FIFA. Upphæðin nemur 6,7 milljónum evra - jafnvirði 943 milljóna króna samkvæmt núgildandi gengi.

Þýska blaðið Der Spiegel birti frétt í síðasta mánuði þar sem því var haldið fram að skipulagsnefndin hafi komið upp sérstökum sjóði upp á 6,7 milljónir evra til að kaupa þau atkvæði sem til þurfti til að vinna áðurnefnda kosningu.

Niersbach neitaði þessum ásökunum og sagði að áðurnefnd greiðsla til FIFA ætti sér eðlilegar skýringar.