Wolff: Samband ökumanna stærsti veikleiki Mercedes

Mercedes liðið gæti valið að losa annan núverandi ökumanna sinna undan samningi ef samband þeirra hefur áhrif á árangur liðsins, segir Toto Wolff, liðsstjóri Mercedes.

Samband ökumannanna tveggja, Lewis Hamilton og Nico Rosberg hefur ekki verið gott og hefur ekki batnað undanfarið.

Samkvæmt Wolff hefur soðið upp úr nokkrum sinnum að undanförnu. Samband Hamilton og Rosberg versnar með hverri keppni.

Wolff segir að samband ökumannanna sé farið að hafa áhrif á liðið. Hann segir að samband þeirra sé stærsti veikleiki liðsins.

„Samband ökumanna er okkar stærsti veikleiki - stundum er sambandið milli liðsins og ökumanna líka erfit,“ sagði Wolff.

Wolff viðurkennir að liðið gæti neyðst til að skipta út ökumanni ef ástandið batnar ekki.

„Þegar við horfum fram á veginn þurfum við að hafa í fyrirrúmi það sem er best fyrir liðið,“ bætti Wolff við.

„Ef við teljum að ökumaður sé ekki að fylgja stefnu, anda og hugmyndum liðsins, gætum við tekið ákvörðun varðandi ökumenn í framtíðinni,“ sagði Wolff.

„Ég tel mikilvægt að hafa hæfileikaríka og hraða ökumenn í bílunum. En við viljum vinna með einhverjum sem er þægilegt að vinna með,“ sagði Wolff að lokum.