Verk Páls Ragnars Pálssonar flutt í Berlínarfílharmóníunni

Fílharmónían í Berlín og strengjasveit Þýsk-skandinavísku fílharmóníunnar flutti verk Páls Ragnars Pálssonar, Dämmerung, fyrir fyrir sópran og strengjasveit þann 4. janúar síðastliðinn. Stjórnandi var Simone Bernandini.

Texti verksins er ljóð eftir Melittu Urbancic (1902-1984). Melitta var austurrískur gyðingur sem flúði ásamt fjölskyldu sinni til Íslands árið 1938 og bjó þar til æviloka. Hún var með doktorsgráðu í bókmenntum, leikkona og skúlptúristi en engin leið var fyrir hana að koma list sinni á framfæri á Íslandi.

Ljóð Melittu sáu ekki dagsins ljós fyrr en á síðasta ári þegar verk hennar voru gefin út í þýðingu Sölva Bjarnar Sigurðssonar í bókinni Frá hjara veraldar / Vom Rand der Welt.

Tónleikarnir voru vel sóttir, yfir þúsund manns mættu og verkinu var vel tekið. Bernandini, sem stjórnaði verkinu, leikur á fiðlu með Fílharmóníusveit Berlínar og má segja að reynsla hans í nýrri tónlist hafi skilað sér beint í flutningi hljómsveitarinnar.