Þúsund Hönnunarmarsipankubbar seldir

Aðdáendur Hönnunarmarsipansins geta farið að setja sig í stellingar, því framleiðsla á því fer á fullt á næstunni. „Mér sýnist á öllu að við séum búnar að selja um þúsund kubba síðan við byrjuðum, hvorki meira né minna,“ segir Rán Flygenring myndlistarkona.

Hún ásamt Örnu Rut Þorleifsdóttur vöruhönnuði hafa gert og selt Hönnunarmarsipan í tengslum við Hönnunarmars síðan 2010, fyrir utan eitt ár, þar sem af óviðráðanlegum ástæðum var ekki hægt að framleiða. Misjafnt er hvort fólk safni kubbunum eða gæði sér á þeim.

„Þetta hefur alltaf rokið út og seldist upp áður en HönnunarMars lauk í fyrra. Í apríl fannst einn kubbur í verslun í bænum og mér skilst að það hafi verið slegist um hann,“ segir Rán.

Liturinn á kubbnum í ár er enn leyndarmál. „Við vinnum þetta í samstarfi við Kólus og það er ekki hægt að nota alla liti í marsipanið þannig að þetta veltur svolítið á því,“ segir Rán en liturinn verður opinberaður í byrjun marsmánaðar. 

„Þetta er í fjórða skiptið sem við gerum þetta og eftirspurnin verður alltaf meiri, en við reiknum með að gera um fjögur hundruð kubba í ár,“ segir hún.