Þessi stelpa er ekkert fórnarlamb

Ævintýrið um Lísu í Undralandi er 150 ára en hún gengur í endurnýjun lífdaga hjá Leikfélagi Akureyrar um þessar mundir. Fyrir dyrum er frumsýning á nýrri leikgerð eftir Margréti Örnólfsdóttur með tónlist eftir dr. Gunna í leikstjórn Vignis Rafns Valþórssonar sem hefur verið vakandi og sofandi yfir Lísu og Undralandinu hennar síðustu vikurnar.

„Magga skilaði inn alveg frábærri leikgerð og svo lenti hún auðvitað í hakkavélinni hjá okkur,“ segir Vignir Rafn og hlær við tilhugsunina. „Það er bara þannig með svona verk að það er ekki hægt að komast nema ákveðið langt á blaði, svo þarf leiksviðið og hópurinn að taka við. Magga hefur tekið þátt í því ferli og gert það gríðarlega vel. Svo erum við með hrikalega skemmtileg lög í þessu eftir doktorinn, þar er hver smellurinn öðrum betri og við erum búin að gefa þessa tónlist alla út frítt á netinu, það er hægt að nálgast hana inni á undralandla.bandcamp.com.“

Vignir Rafn þekkti ekki söguna um Lísu í Undralandi neitt sérstaklega vel þegar hann tók að sér þetta spennandi verkefni. „Ég hafði aldrei lesið bókina svo ég bara vatt mér í það verkefni. Satt best að segja var ég ekkert sérstaklega hrifinn. Fannst þetta fyrst svona nett leiðinleg og undarleg saga sem fer úr einu dæminu í annað án þess að tengja neitt sérstaklega þar á milli.

Það er alveg það versta sem maður lendir í innan leikhússins að saga sé alltaf að enda. Þannig að í okkar útgáfu er þetta allt mikið breytt og við leggjum áherslu á að láta þetta allt saman flæða. Það var mikil áskorun í þessu litla leikhúsi að tengja alla þessa heima saman en Sigríður Sunna, sem er með leikmynd og búninga, leysir það snilldarlega. Það var útbúið hringsvið á litla leiksviðinu og svo eru unglingar á Akureyri bara sveittir við að snúa þessu og standa sig með sóma.“

Lísa í Undralandi þykir stundum eiga erindi til barna fremur en fullorðinna en Vignir Rafn segir þessa sýningu höfða til ákaflega breiðs hóps. „Sýningin er góð skemmtun fyrir alla og á líka erindi til okkar allra. Í meðförum Möggu er Lísa ekkert fórnarlamb heldur gerandi og henni hefur tekist að skapa alvöru kvenhetju, stelpu sem stendur og segir: Það ræður enginn yfir mér! Thelma Marín Jónsdóttir, sem leikur Lísu, tekur við þessu kefli af prýði og tekst að skapa fyrirmynd stelpna með fjörugt ímyndunarafl. Skemmtilega og lifandi stelpu sem berst fyrir því að fá að vera hún sjálf og lendir í allskyns skemmtilegum ævintýrum á leiðinni.“