Skrefið í sterkari deild gerir mig vonandi að betri leikmanni

Aron Jóhannsson skrifaði í gær undir fjögurra ára samning við þýska stórveldið Werder Bremen en þýska félagið greiðir AZ Alkmaar fimm milljónir evra fyrir Aron. Áhugi Werder Bremen kom skyndilega upp og var Aron ánægður með að félagsskiptin væru í höfn.

„Þetta gekk allt saman frekar hratt yfir en það er ánægjulegt að þessu er lokið. Þetta ferli tók innan við viku en strax og við fréttum af áhuga þeirra sögðu forráðamenn Werder Bremen við okkur að þeir væru staðráðnir í að klára þetta sem fyrst.“

Gott skref fyrir ferilinn

Aron hefur hægt og bítandi farið í sterkari deildir en hann lék tvö tímabil með AZ Alkmaar í Hollandi eftir þrjú ár í Danmörku.

„Það er ekkert öruggt í þessu. Ég get ekki sagt að þessi deild henti mér vel en þeir aðilar sem ég talaði við töldu að leikstíllinn þarna myndi henta mér. Ég hefði ekki gengið til liðs við félagið ef ég mér litist ekki vel á þetta,“ sagði Aron en Werder Bremen er þriðja atvinnumannaliðið hans.

„Ef mér hefði verið boðin þessi leið að fara frá Íslandi til Danmerkur, þaðan til Hollands og loksins Þýskalands hefði ég stokkið á það tækifæri. Ég vildi taka eitt skref í einu og vera rólegur í stað þess að taka of stórt skref,“ sagði Aron sem var spenntur fyrir því að leika á

heimavelli Werder Bremen.

„Auðvitað verður frábært að spila alla stórleikina á þessum völlum en ég er mest spenntur fyrir því að spila fyrir framan stuðningsmenn Werder Bremen. Það er talað mikið um að aðdáendurnir hérna séu mjög góðir og það verður vonandi gaman að spila fyrir framan þá.“

Werder Bremen varð síðast meistari fyrir ellefu árum en liðið lenti í tíunda sæti á síðasta tímabili.

„Ég er búinn að kynna mér liðið undanfarna daga og það er góður kjarni af ungum leikmönnum með reynslu af deildinni. Stefnan er að gera betur en í fyrra og ég tel að mannskapurinn sé betri en staðan í fyrra gaf til kynna.“

MLS kom ekki til greina



Aron hefur ekkert farið í felur með það að hann langi einn daginn að spila í bandarísku deildinni. Hann heyrði af áhuga liða úr deildinni en ekkert lið gekk svo langt að gera tilboð í Aron.

„Ég velti því ekki fyrir mér í þetta skiptið. Ég hef oft sagt það áður að mig langi einhvern tíma til að spila í MLS-deildinni og ég efast ekki um að ég muni gera það einn daginn. Það var smá áhugi hjá einhverjum liðum en það gekk ekkert lengra en það,“ sagði Aron sem ræddi við Andreas Herzog, aðstoðarþjálfara bandaríska landsliðsins og fyrrum leikmann Werder Bremen, sem og Jürgen Klinsmann, þjálfara bandaríska landsliðsins, um félagsskiptin.

„Andreas gaf þeim góð meðmæli um mig og gaf mér góð meðmæli um liðið og borgina. Hann var góð hjálp fyrir báða aðila í þessu máli. Ég held að þeir séu bara báðir ánægðir að ég sé að taka skref í sterkari deild sem gerir mig vonandi að betri leikmanni.“

Fjórða sætið voru viss vonbrigði

Aron var hluti af bandaríska landsliðinu sem lenti í fjórða sæti í Gullbikarnum í sumar. Aron var ánægður með tækifærin sem hann fékk á mótinu en óánægður með uppskeruna á heimavelli.

„Þetta var örlítið öðruvísi reynsla en mjög skemmtileg. Undirbúningurinn var stuttur, ég kom til móts við liðið tíu dögum fyrir fyrsta leik. Þetta var mjög skemmtilegt mót og töluvert erfiðara en ég held að Evrópubúar geri sér grein fyrir. Ég spilaði nokkra leiki og mér fannst ég standa mig vel en það voru vissulega vonbrigði að ná ekki að klára þetta mót,“ sagði Aron en bandaríska liðið tapaði nokkuð óvænt fyrir Jamaíka í undanúrslitum.

„Við vorum skiljanlega gagnrýndir eftir mótið. Við vorum með lið sem átti að berjast um titilinn á þessu móti og það var aldrei talað um neitt annað en að við færum í úrslitaleikinn. Það voru mikil vonbrigði að detta út í undanúrslitunum í leik sem við vorum mun betri aðilinn,“ sagði Aron.

Ánægjulegt að Fjölnir fái pening

Aron sem er uppalinn í Fjölni sagðist gleðjast yfir því að uppeldisfélagið fengi peninga við félagsskiptin og að vonandi væri hægt að nýta þá vel.

„Þetta er lið sem hefur hjálpað mér í gegn um tíðina og ekki veitir af fyrir félagið að fá smá pening. Vonandi geta þeir nýtt þetta vel og byggt upp gott lið. Þeir eru búnir að fá pening fyrir mig núna nokkrum sinnum svo þeir geta vonandi haldið áfram að byggja upp í kringum völlinn líka. Það væri gott fyrir fólkið í Grafarvoginum að fá stúku á völlinn,“ sagði Aron sem leist vel á þá hugmynd blaðamanns að stúkan yrði nefnd eftir honum.

„Ef ekki verður maður fyrir smá vonbrigðum,“ sagði Aron léttur að lokum.