Nam opnar á Laugaveginum á föstudaginn

Veitingastaðurinn Nam mun opna á Laugveginum næstkomandi föstudag en staðurinn var tilbúinn til opnunar í júlí í fyrra en mátti ekki opna vegna skilyrðis veitingaleyfis í rýminu sem Nam leigir.

Þar segir að veitingastaður í rýminu megi ekki sjást frá götunni en lausn fannst á því vandamáli í desember síðastliðnum. Hún felst í því að veitingastaðurinn sem búið var að setja upp hefur verið færður sex metrum innar í rýminu.

Skilyrðið er sett vegna ákvæða í Aðalskipulagi Reykjavíkurborgar 2010-2030 um að veitingarekstur megi ekki fara yfir þrjátíu prósent hlutfall af rýmum í borginni á miðborgarsvæði. Málið vakti talsverða athygli fjölmiðlum síðastliðið sumar og voru eigendur Nam skiljanlega svekktir yfir því að geta ekki opnað fullbúin veitingastað vegna ákvæðis í veitingaleyfinu sem þeir höfðu ekki tekið eftir.

Emil Helgi Lárusson, annar eigenda Nam, segir í tilkynningu að ferðin um kerfið hafi verið athyglisverð en nú sé bara skemmtun framundan. Það sé frábært að opna veitingastaðinn í miðbæ Reykjavíkur og fara í samstarf með ferðaskrifstofunni Around Iceland sem verður í fremra rýminu sem má sjást frá Laugaveginum.