Barcelona áfram en Atletico úr leik

Barcelona er komið í undanúrslit spænsku bikarkeppninnar eftir 5-2 samanlagðan sigur á Athletic Bilbao.

Börsungar lentu reyndar undir á heimavelli í síðari leik liðanna í kvöld er Inaki Williams kom Bilbao yfir á 12. mínútu.

En Barcelona skoraði þrjú mörk í síðari hálfleik þökk sé þeim Luis Suarez, Gerard Pique og Neymar og tryggði sér þar með öruggan sigur.

Atletico Madrid er hins vegar út leik eftir að hafa tapað fyrir Celta Vigo á heimavelli í kvöld.

Ekkert mark var skorað í fyrri leik liðanna en annað var uppi á teningnum í kvöld. Pablo Hernandez skoraði tvö mörk fyrir Celta, sem komst í 3-1 forystu um miðjan síðari hálfleikinn, og John Guidetti eitt. Antoine Griezmann og Angel Correa skoruðu mörk Atletico.

Fjórðungsúrslitin klárast annað kvöld.