FME sektar Almenna lífeyrissjóðinn

Stjórn Fjármálaeftirlitsins tók þá ákvörðun þann 12. febrúar síðastliðinn að leggja stjórnvaldssekt að fjárhæð átján milljóna króna á Almenna lífeyrissjóðinn.

Ástæða þess er brot gegn lögum um verðbréfaviðskipti. Í mars 2015 keypti lífeyrissjóðurinn í skuldabréfaflokknum HSVE 13 01, sem útgefinn er af HS Veitum hf., á sama tíma og lífeyrissjóðurinn bjó yfir innherjaupplýsingum sem vörðuðu skuldabréfaflokkinn.

Forsaga málsins er sú að skuldabréfaflokkurinn HSVE 13 01 var gefinn út af HS Veitum og skráður í kauphöll Nasdaq Iceland hf. árið 2013. Hinn 19. febrúar 2015 bauð miðlari hjá tilteknum banka Almenna lífeyrissjóðnum skuldabréf í flokknum til kaups, en á þeim tímapunkti höfðu aldrei átt sér stað viðskipti með þann skuldabréfaflokk á eftirmarkaði. Ekkert varð úr þeim viðskiptum.

Fram kemur í ákvörðuninni að í byrjun mars 2015 var Almenna lífeyrissjóðnum boðið að taka þátt í lokuðu skuldabréfaútboði vegna nýs skuldabréfaflokks sem HS Veitur höfðu í hyggju að gefa út, HSVE 15 01. Í viðræðum við verðbréfafyrirtæki það sem sá um skuldabréfaútboðið fékk Almenni lífeyrissjóðurinn ýmsar upplýsingar um hinn nýja skuldabréfaflokk, til að mynda að skuldabréfaflokkurinn ætti að vera algjörlega samhljóða eldri skuldabréfaflokki sama útgefanda, HSVE 13 01 og að til stæði að sameina skuldabréfaflokkana. Þá var frá upphafi gefið til kynna að skuldabréfaflokkurinn yrði seldur með ávöxtunarkröfunni 3,4 prósent.

Föstudaginn 6. mars 2015 fengu starfsmenn lífeyrissjóðsins upplýsingar frá umsjónaraðila útboðsins sem voru þess eðlis að ætla mátti að skuldabréfaútboðinu yrði lokið á ávöxtunarkröfunni 3,4 prósent. Almenni lífeyrissjóðurinn lýsti því yfir við umsjónaraðila útboðsins að hann hefði ekki áhuga á að kaupa á þessari ávöxtunarkröfu. Stuttu síðar sama dag hafði starfsmaður lífeyrissjóðsins samband við miðlarann sem hafði hinn 19. febrúar 2015 boðið skuldabréf í HSVE 13 01 og spurði hvort hann væri enn með til sölu skuldabréf í flokknum.

Mismunurinn nam fimm milljónum króna

Miðlarinn kannaði áhuga seljanda mánudaginn 9. mars 2015 og 10. mars 2015 kom hann þeim skilaboðum til Almenna lífeyrissjóðsins að seljandi hefði áhuga á að selja í skuldabréfaflokknum á ávöxtunarkröfunni 3,6 prósent. Lífeyrissjóðurinn tók þessu tilboði sama dag og keypti fyrir um 300 milljón krónur á ávöxtunarkröfunni 3,6 prósent. Var um að ræða fyrstu tilkynntu viðskiptin með skuldabréfaflokkinn HSVE 13 01 á eftirmarkaði. Mismunur þess að kaupa bréfin 10. mars 2015 á ávöxtunarkröfunni 3,6 prósent í stað 3,4 prósent nam tæplega 5 milljónum króna.

Lesa má nánar um ákvörðunina hér.