Ísland Got Talent: Sindri uppskar standandi fagnaðarlæti frá Ágústu

„Þú ert gullbarki. Aldeilis gott að þú haldir rétt á spöðunum, drengur" er það sem Ágústa Eva Erlendsdóttir hafði að segja um frammistöðu hins 13 ára gamla Sindra Freys í Ísland Got Talent-þætti kvöldsins.

Þar lék Sindi á úkúlele og söng lagið When I was Your Man með söngvaranum góðkunna Bruno Mars. Sindri, sem hafði ferðast í fimm klukkustundir frá Ísafirði til að geta stigið á stokk í Austurbæ, hefur sungið og spilað frá unga aldri.

Það skilaði sér svo sannarlega á sviðinu því áhorfendur áttu erfitt með að halda aftur af fagnaðarlátunum meðan á flutningi Sindra stóð.

Að honum loknum ætlaði allt um koll að keyra og hlaut Sindri standandi fögnuð frá viðstöddum, þeirra á meðal frá fyrrnefndri Ágústu Evu.

Flutning Sindra, og geðshræringu hans að honum loknum, má sjá hér að ofan.