Tímabilinu lokið hjá Vonn

Meiðsli halda áfram að gera skíðakonunni Lindsey Vonn lífið leitt og nú er tímabilinu hjá henni lokið vegna meiðsla.

Hún byrjaði tímabilið seint þar sem hún var að jafna sig eftir ökklabrot og endar það snemma vegna meiðsla líka.

Vonn fótbrotnaði í keppni um síðustu helgi. Hún féll illa á laugardeginum en keppti samt daginn eftir. Í kjölfarið komu í ljós þrjú brot á sköflungnum rétt fyrir neðan hné.

Þetta er grátlegt fyrir Vonn sem er í efsta sæti stigalistans í baráttunni um heimsbikarinn.

Vonn er sigursælasta skíðakona allra tíma og menn spyrja sig nú að því hvort hún eigi meira inni eftir öll þessi meiðsli.