Rúrik náði ekki að bjarga málunum og Nürnberg tapaði

Rúrik Gíslason og félagar í þýska liðinu Nürnberg spila áfram í þýsku b-deildinni eftir tap á heimavelli á móti Eintracht Frankfurt í kvöld í seinni umspilsleik liðanna um laust sæti í Bundesligunni.

Nürnberg náði 1-1 jafntefli í fyrri leiknum á heimavelli Eintracht Frankfurt og var því í góðum málum fyrir seinni leikinn á sínum heimavelli.

Eintracht Frankfurt endaði í þriðja neðsta sætinu í Bundesligunni en 1. FC Nürnberg í þriðja efsta sæti b-deildarinnar.

Svissneski landsliðsmaðurinn Haris Seferović var hetja síns liðs í leiknum en hann skoraði eina markið á 66. mínútu.

Rúrik Gíslason byrjaði á varamannabekknum en kom inná í tvöfaldri skiptingu átta mínútum eftir markið. Rúrik spilaði því síðustu sextán mínúturnar í kvöld. Hann fékk aðeins að spila eina mínútu í fyrri leiknum.

1. FC Nürnberg liðið eins og það heitir fullu nafni hefur spilað í b-deildinni undanfarin tvö tímabil og nú er ljóst að liðið þarf að eyða þar einu tímabili í viðbót.

Rúrik Gíslason var ekki valinn í EM-hópinn á dögunum og er því kominn í sumarfrí. Hann missti mikið úr í vetur vegna meiðsla á hásin.

Þetta var fyrsta tímabil Rúriks með Nürnberg-liðinu en hann er með samning út næstu tvö tímabil eða til ársins 2018.