Blanda komin í 81 lax á öðrum degi

Opnunin í Blöndu í gær hverfur vafalaust seint úr minni þeirra sem voru við bakkann í gær og veislan heldur bara áfram.

Það var ótrúleg opnun í Blöndu í gær þegar 51 laxi var landað á fyrsta degi og aldrei fyrr hefur áin opnað með þvílíkum látum og nú.  Aðstæður hafa allar verið hinar bestu og það sem meira er að mikið af laxi er að ganga og hefur takturinn verið líkari því sem menn eiga að venjast um og eftir miðjan júní.  Eftir daginn í gær eru komnir 81 lax á land en morgunvaktin í gær gaf 21 lax og síðdegisvaktin 9 laxa.  Síðast þegar athugað var með laus leyfi í Blöndu voru örfáar stangir eftir núna í júní og ef þær eru ekki þegar farnar þá verður væntanlega nóg að gera hjá þeim sem svara í símann hjá leigutakanum Lax-Á í dag.

Þetta er frábær opnun í alla staði og núna er nokkuð ljóst á öllu að tveggja ára laxinn er líklega að eiga mjög gott ár en aðeins fimm laxar úr Blöndu eru eins árs laxar samkvæmt okkar upplýsingum og restin allt fallegur tveggja ára lax 78 til 100 sm.  Ef þetta þýðir að uppeldi seiða í hafinu hafi tekist vel í vetur vona líklega allir að eins árs laxinn skili sér líka í góðu formi en það kemur venjulega í ljós í stóra júní straumnum.  Þá koma gjarnan stærstu göngurnar og næstu 2 vikur þar á eftir.